Rev 10 | MYW | STEP | Mo akin Yowbad nataka̱yob teitan meinoy neim walba̱lab; mtowen tawtoun, anakweim ma̱wana lov, wuleil isob wakunuwatan, magin ankakin ma̱wana ka̱las, kaken mamagina mayen kov kaliboleb.

Revelation of John 10

Yowbad nataka̱yob son nabuk kakit-wan

1 Mo akin Yowbad nataka̱yob teitan meinoy neim walba̱lab; mtowen tawtoun, anakweim ma̱wana lov, wuleil isob wakunuwatan, magin ankakin ma̱wana ka̱las, kaken mamagina mayen kov kaliboleb.

2 Nabuk kakit bo ilat wanaman nises. Kaken naka̱tay isen wa̱yol, nakimaw waven.

3 Iwak, aygan avakaein, mamagina aygan layon, mo pala̱pal iway, ivag ages kweinim kweiy.

4 Pala̱pal ages kweinim kweiy ivag ikous, mo asilamaw ba̱lel; tage aygan teitan walba̱lab aligen, ilana, “Kwayus ages pala̱pal tasiyas kweinim kweiy, bweina bises wananoum. Awoum kulel bein wa̱buk; awoum.”

5 Yowbad nataka̱yob towen nakin nitet wa̱yol son ven, mo itamnow naka̱tay in wanakaew, itabudabod wayagan towen nises isigeg, o nibun liba̱lab son youd babaw nises waseg, o nibun pwepway son youd babaw nises waseg, o nibun yol son youd babaw nises waseg; e, itabudabod, ilana, “Bo beiyakous tut, peinan bwa̱gig kweinim katanok niyikis ikous, katanok nises; igaw gum-liba̱lab biyik nabwa̱gig towen, Yowbad mo bivag ma̱wan nanon tonen. Gamag babaw nag ikakins nanon, tage kweiboug nidibakes natouwat tasiyas palopits.”

8 Aygan towen walba̱lab vayuwein mo aligen, ilana, “Kunek gum-liba̱lab towen nitet wa̱yol son ven, kukow nabuk towen kakit nilat wanaman niysiyous.”

9 Mo anek gum-liba̱lab towen, adibek, alana, “Kusekeig buk towen.”

Ilana, “Kukow, kukwam; kayoum bilakamnag, mamagina kitoul, tage bukusimkwen wanuwam mo bimunmwanawl.”

10 Mo akow buk towen kakit wanaman towen, a̱kam, kayoug mo ilakamnag ma̱wana kitoul, tage wankuyeim asimkwen nuwag mo imunmwanawl.

11 Mo idibakeig, ilana, “Kadilok vayuwein bukulivan gamag babaw livneis, siven kweitan kweitan, ages kweitan kweitan, o guyawaw babaw livneis.”